صبا کے ہاتھ پیلے ہوگئے

میں ساعت سرشار میں

لاکھوں دعائیں

خوبصورت آرزوئیں

پیش کرتا ہوں

صبا ممنون ہے

لیکن زباں ہے

کچھ نہیں کہتی

صبا اب روز و شب

دیوار و در تن پر سجاتی ہے

اب آنچل چھت کا سر پر اوڑھتی ہے

لمس فرش مرمریں سے

پاؤں کی تزئین کرتی ہے

وہ کہساروں شگفتہ وادیوں جھرنوں

چمکتے نیلگوں آکاش کے

نغمے نہیں گاتی

صبا اب لالہ و گل کی طرف شاید نہیں آتی

صبا شبنم ادا تصویر پا بستہ

در روزن میں آویزاں

حسیں نازک بدن

روشن منور ساحلوں پر اب نہیں بہتی

صبا لب کھولتی ہے مسکراتی ہے

صبا سرگوشیوں میں

اب کسی سے کچھ نہیں کہتی

جب کتے رات کو روتے ہیں

تو اکثر لوگ سمجھتے ہیں

کچھ ایسا ہونے والا ہے

جو ہم نے اب تک سوچا تھا نہ ہی سمجھا تھا

جو ہونا تھا وہ کب کا لیکن ہو بھی چکا

یہ شہر جلا

اس شہر میں روشن ہنستے بستے گھر تھے کئی

سب راکھ ہوئے

اور ان کے مکیں

کچھ قتل ہوئے

کچھ جان بچا کر بھاگ گئے

جو با عصمت تھیں

رسوائی کی خاک اوڑھ کے راہ گزر پر بیٹھی ہیں

کچھ بیوہ ہیں

کچھ پابستہ رشتوں کی وحشت سہتی ہیں

کچھ ادھ ننگے بھوکے بچے

دن بھر آوارہ پھرتے ہیں

ہر جانب مجرم ہی مجرم

ان میں سے کچھ ہیں پیشہ ور

کچھ سیکھ رہے ہیں جرم کے فن کے راز نئے اسرار نئے

جو ہونا تھا یہ سچ ہے اس میں سے تو بہت کچھ ہو بھی چکا

لیکن شاید کچھ اور بھی ہونے والا ہے

کتے تو آخر کتے ہیں

دن بھر کچرے کے ڈھیروں پر

وہ مارے مارے پھرتے ہیں

جب رات اترنے لگتی ہیں

آنے والے دشمن موسم کی دہشت سے

سب مل کر رونے لگتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔