ایک مرتبہ کی بات ہے ایک آدمی کا گزر پٹن سلطنت (موجودہ للت پور)سے ہوا۔ وہاں وہ رگھو نام کے آدمی کو دیکھ کر بہت حیران ہو اجو تیل نکالنے والی میل میں جانوروں کی طرح پہئے کو گول گول گھما رہا تھا۔
مسافر نے پوچھا ” تم کب تک اسے یوں ہی گھماتے رہو گے؟“ رگھو نے جواب دیا ۔” فکر مت کرومیر ے دوست کل سب بدل جائے گا!“
کچھ دنوں بعد مسافرکا دوبارہ اسی جگہ سے گزر ہوا۔اس بار وہ پہلے سے اور زیادہ حیران ہوگیا وہی رگھو جسے تیل کی میل میں جانوروں کی طرح کام کرتے دیکھا تھا اب وہ میل کا مالک بن چکا تھا ۔مسافر نے اسے اس ترقی پر مبارک باد پیش کی ۔رگھو نے شکریہ ادا کیا اور کہا” میرے دوست کل سب بدل جائے گا۔“
اگلی مرتبہ اسی شہر سے جب مسافر کا گذر ہوا ۔اس بار حیرت کی انتہانہ رہی ۔رگھو پٹن سلطنت کا راجا بن چکا تھا ۔ ” یہ کیسے ہوا میرے دوست؟“ مسافر نے پوچھا۔ رگھو نے بتایا کہ جو اس سے پہلے راجاتھا اس کا انتقال ہو گیا اور علاقائی دستور کے مطابق راجا وہی شخص بنتا ہے جسے شاہی ہاتھی پھولوں کا ہار پہنائے۔ شہرکے سب لوگ جمع ہوئے شاہی ہاتھی میرے قریب آیا اورمجھے ہار پہنا دیا۔
”مجھے سن کربہت خوشی ہوئی رگھو ۔بہت بہت مبارک ہو!“
رگھو مسافر سے بغل گیر ہوگیا اور معمول کے مطابق کہا” فکر مت کروکل سب بدل جائے گا !“
کچھ دنوں بعد پھر مسافر کا گزر اسی جگہ سے ہو ا۔اس بار وہ اور زیادہ حیران ہواکیوں کہ اسے وہاں اینٹ اور پتھروں کا ڈھیر اور منہدم عمارتیںنظر آئےں۔وہاں محل ،شہر اور رگھو کا نام و نشان نہ تھا ۔مسافر کو بے حد تکلیف ہوئی جب اسے کسی سے پتہ چلا کہ زلزلے میں پورا شہر برباد ہو گیا۔
پھر مسافر کو رگھو کی وہ بات یاد آئی جو وہ بار بار کہتا تھا کہ کل سب بدل جائے گا ۔ مسافر نے اپنے آپ سے کہا واقعی کل سب بدل جائے گا!“
سبق : ہر چیز فانی ہے/کوئی بھی چیز ہمیشہ کے لئے باقی نہیں رہتی۔
انگریزی سے ترجمہ : حیدر شمسی